喺《小王子》世界入面，主角小王子悉心照顧星球上唯一嘅玫瑰花，代表住一份獨一無二嘅愛情。本地花店Le' Sean Seasons Florist早排將呢份愛情帶嚟香港，用保鮮玫瑰花製成一朵朵保護喺玻璃罩下嘅精美「小王子花」，受到唔少惜花人追捧。

保鮮花技術早喺10年前由法國人發明，再由日本人改良同發揚光大，現時幾乎所有保鮮玫瑰，都係嚟自日本投資嘅厄瓜多爾花田，每月產量只有40萬朵，最頂級嘅20%更只係供應畀日本本土。

但俗語話「天涯何處無芳草」，嘅然市面上都有唔同嘅保鮮花，點解大家都咁單戀呢「一枝花」呢？

花店老闆Sean同費清講，佢本來之前喺日本攞嘅都係普通貨，但因為自己有設計底子，又專門讀過花藝，整出嚟嘅花靚到日本方面都注意到，仲派員親自飛嚟香港簽訂協議，成為日本境外唯一頂級20%保鮮玫瑰嘅代理。短短半年，Sean已經由1間分店擴充到5間，每個月營業額有成200萬咁多。

電影版《小王子》嚟緊嘅聖誕喺香港上映，花店就同法國合作推出限量版1,000朵嘅「真‧小王子花」，以大紅玫瑰襯淡綠繡球花及小王子公仔，每個賣1,680蚊；連玫瑰花香香水及2張電影戲飛嘅套裝亦有1,000套，每套賣2,080蚊。

仲有大半個月先到聖誕，但相信唔少男士已經訂好晒位，準備平安夜同另一半撐住枱腳慶祝。喺呢個咁浪漫嘅場合，可以考慮吓送「小王子花」，既有意思，又唔會好似普通鮮花咁放幾日就謝唔夠環保。

而且繼費清話，保鮮花最大嘅好處係可以擺幾年，亦即係話幾年之內都唔洗再煩送咩花，簡直可以話係一勞永逸嘅方法。

費清＃要生計，也要生活＃毋忘初衷